(TEKSTO/PHOTO BY KOI HIPOLITO)

INARESTO ng mga operatiba ng pinagsanib na puwersa ng Regional Special Operations Unit (RSOU-NCRPO) at District Special Operation Unit (SPD-DSOU) ang 60 katao kabilang ang tatlong empleyado ng barangay nang maaktuhan ang mga itong iligal na namimili at nagbebenta ng kanilang mga boto sa loob mismo ng barangay hall ng Barangay San Isidro, No.2246 Marconi St., sa lungsod ng Makati, gabi ng Sabado.

Nakilala ang walong suspek na bumibili ng boto ng kanilang mga ka-barangay na sina Karen May Matibag, barangay treasurer, Medlyn Joy Ong, barangay secretary , Marie Antoinette Capistrano, barangay administrative staff, Wenifredo Ong, Mario Luis Siriban, Adrian Chiapoco, John Brian Matibag at Maria Liberty Dacullo.

Batay sa ulat na ipinadala ni RSOU Chief P/Col. Rogarth Bulalacao Campo kay NCRPO Chief P/BGen. Guillermo Lorenzo Eleazar, nakatanggap umano sila ng impormasyon galing sa concerned citizen na may nagaganap na aktibidad ng “vote buying” sa loob ng barangay hall ng nasabing lugar. Naaktuhan ang mga ito na namamahagi ng pera sa nagkakagulong tao sa lugar at agad na inaresto ang walong suspek.

Nasabat sa posisyon ng mga suspek ang 820 piraso ng P500.00 na nagkakahalaga ng P410,000 cash, 19 identification cards, 10 cellular phone, listahan ng pangalan ng mga botante at voters precincts at dalawang box na may  tatak na Ulat sa Bayan leaflets na nakapangalan kay incumbent Makati City Mayor Mar-Len Abigail Binay.